New Buildings in Libya مباني جديدة في ليبيا

ثلاثيات ليبية

ثلاثة يتمناهم الليبيين: السكن في طرابلس ... والعلاج في تونس ... والوصول لسن التقاعد.

ثلاثة ما تحلمش بيهم : السفر للسياحة ... وتصيف مع عايلتك ... وكأس العالم في ليبيا.

ثلاثة صعب نتخلى عنها : الماء ... والهواء ... والبازين .

ثلاثة لازم نتخلى عليهم : التفنيص ... والتلقيح ... والبني خارج المخطط .

ثلاثة تسبب الإحباط : الواسطة ... و الديون ... والمنتخب الليبي .

ثلاثة يرفعوا الضغط : الملح ... وزحمة المرور ... والعيل كان عشش .

ثلاثة تسبب الغرور : الفيلا ... والهمر ... وبدلة الحرس البلدي .

ثلاثة مايحبوهمش الليبيين: التعليم ... و المصريين ... والشبشب المقلوب.

ثلاثة ما يرقدوش الليل : المديون ... والخانب ... وواحد نايضة عليه السوسة .

ثلاثة شبه اختفوا من ليبيا : الدلاع الطويل ... واحترام الشيابين ... والفراشية .

ثلاثة ما تحسش بطعمتهم الا في ليبيا : شاهي العاله... وامبكبة على الحطب ... والبورديم .

ثلاثة تدعو لهم بالهداية : البلعوط ... والمحسدي ... واللي يشجع في نادي الوحدة.

ثلاثة ما تستغربهمش في ليبيا : واحد قاص السريع على رجليه ... وواحد يسوق في الاتجاه المعاكس ... ومتعين وعمره عامين.

ثلاثة تتمنى ما تتصبحش فيهم : سواق افيكو مستعجل ... وطابور طويل في الشيل ... ومديرة المدرسة وفيدها عصا.

ثلاثة ما تعرفش أمت تخشلهم : السجن ... والمستشفى ... ومكب القوى العاملة.

ثلاثة ما ليهمش معنى إلا في ليبيا : العسلوز ... والزميطة ... والعصبان .

ثلاثة ربي يفكك منهم : مجاري مفتوحة ... وكلب مطلوق ... ورشادة طايشة .

ثلاثة إيديرو فيهم الليبيين بس : الهروب من الأحمر... والدفال على رأس بمبلي الغاز ... وتنفيض فرشة الماكلة من الروشن.

هل ستكون صحراءنا الليبية بالوعة فيضانات العالم

مشكلة ارتفاع منسوب مياه البحار بسبب ظاهرة الإحتباس الحراري
هل سيكون حلها على حساب صحراء ليبيا؟

وصلني هذا الخبر من صديق وأرجو ممن لديه اي إيضاح أو تصحيح أن يكرمنا بما لديه
والخبر يقول أنه : قد
القى دكتور متخصص فى مجال البيئة محاضرة
فى جامعة غلاسكو - بريطانيا
يوم الثلاثاء الموافق 16 - 2 - 2010
موضوعها حل مشكلة ارتفاع مياه البحار
الناتج عن ذوبان الثلوج بسبب ارتفاع درجة حرارة سطح الأرض
فيما يعرف بظاهرة الدفيئة أو الإحتباس الحراري
وفكرة حل هذه المشكلة التي ناقشها المحاضر هي
حفر قناة بحرية من خليج سرت إلى عمق الصحراء الليبية
هذه القناة ستبدأ بالإنحدار للإسفل لأن مستوى الأرض في الجنوب الليبي منخفض عن سطح البحر
وبعد الحفر ستتدفق المياه ذاتيا إلى الصحراء وستتجمع مياه البحر
الناتجة عن ذوبان الجليد في القطب الشمالي في الصحراء الليبية
وكان من ضمن الحاضرين طالب ليبى :اعترض وقال للدكتور:
باى حق تريدو ان تغرقوا بلدنا.
فقال له هذا المشروع المستقبلي سيكون ذو إستفادة مزدوجة
لأن نقل مياه البحر إلى الصحراء الليبية
سيساهم في خفض مستويات مياه البحر
وفي الجانب الأخر
فإن تبخر هذه المياه في الصحراء الليبية سيساعد في تكون سحب ممطرة
وهذه السحب ستجعل ليبيا تملك ثروة مطرية هائلة
وربما ستحول الصحراء الليبية إلى غابات كما كانت قبل ملايين السنين
وقال الدكتور عن هذا المشروع المستقبلى
إن ليبيا حاليا تعتبر هدفا مهما للدراسات حول هذه الفكرة

وقال بوضوح
ان هذا الامر يدرس حاليا فى الجامعات الامريكية
وسيتم عرض الفكرة على ليبيا
لتنفيذ المشروع بتمويل من صندوق النقد الدولى
------
فهل هناك من يدرس هذا الموضوع من بلدي الحبيب ليبيا
وأين خبراء البيئة الليبيين وأين الإعلام الليبي والمخططين الليبيين
وماذا عن مستقبل المياه الجوفية الليبية ومستقبل النهر الصناعي
ومستقبل المخزون النفط الليبي
ومستقبل المناخ الليبي والبيئة الليبية
والسواحل الليبية
والإنسان الليبي